Ils «caps»

Cun la street fashion, la moda da la scena da hip-hop, èn las chapitschas da pala vegnidas fitg en moda. Per ils veritabels fans da chapitschas èsi in putgà da discurrer be da chapitschas da palas. Meglier èsi da dir «cap». Quai è dentant pir l’entschatta da la scienza. I dat almain set differents stils da «caps». Numnadamain: «new era», «Cuba-cap», «flex fit», «trucker», «taxi», «girl-cap» e sco davos il simpel chapè en la furma da pli baud ch’è gist en il trend. La gronda part dals giuvens porta «new era», «flex fit» u «trucker». Il «new era» enconusch’ins vid la pala platta, il «flex fit» ha in gummi elastic, ed il «trucker» ha davostiers ina rait.