«Balla balla balla!»

La chanzun da ballapè ha auta conjunctura! Ed uss er anc ina per rumantsch? Ma attenziun: la «Balla balla balla!», chantada da La Squadra 08, n’è oriundamain betg vegnida concipida per l’EURO 08. Emprim motiv per questa producziun speciala entaifer la retscha Top Pop dal Radio Rumantsch è l’EUROPEADA, il champiunadi da ballapè da las minoritads europaicas. «Ma jau vuleva tuttina far ina chanzun cun in messadi che po valair er per l’EURO e che cuzza vinavant, tant per champiunadis futurs u per il simpel gieu regiunal» declera Benedetto Vigne, l’autur e cumponist da la chanzun.