Crestaulta

Crestaulta è in impurtant lieu da culegna dal temp da bronz, situada sin la terrassa d'ina collina a ca. 300 m al vest da Surin. Walo Burkart l'ha scuverta il 1935 ed ha interprendì exchavaziuns parzialas il 1935-38. Attestadas èn trais fasas da colonisaziun: en la stresa inferiura dal temp da bronz tempriv han ins mess a la glisch numerusas foras per pals da simplas construcziuns en lain cun fuclars. Da la segunda stresa, probablamain gia dal temp da bronz mesaun, derivan diversas construcziuns cun mirs sitgs per part massivs. En la stresa superiura, databla en il temp da 1500/1400-1300 a.C., han ins chattà fastizs da fuainas, da suladas e d'in palantschieu da lain. [Tenor e-lir].

(Foto: Adrian Michael / CC BY-SA 3.0)