La societad feudala retica

Entaifer la societad retica dal temp medieval tempriv sa laschan eruir trais categorias da persunas: libers da naschientscha, liberads e servs. La libertad da la persuna era la premissa per pudair daventar guerrier u member d’ina dretgira. Las trais categorias numnadas chatt’ins en variantas tant tar ils Romans sco er tar ils Germans. Da la cumbinaziun da quellas cun il sistem feudal è naschida la societad da stans dal temp medieval. Sut l’influenza da la teologia cristiana na sa chapiva quella betg mo sco product da l’istorgia u sco creaziun umana, mabain sco societad stgaffida da Dieu.