Ils 6 d’avust 1806

Ils 6 d’avust 1806 ha Francestg II (1768–1835) suttascrit a Vienna sia renunzia a la dignitad ed als duairs d’imperatur roman. El ha dentant salvà il titel d’imperatur da l’Austria ch’el aveva creà e surpiglià l'onn 1804. Napoléon Bonaparte aveva ruinà ils fundaments dal vegl imperi, transfurmond la carta politica dals pajais tudestgs e stgaffind sez 1804 in agen imperi. La Frantscha aveva annectà las parts principalas da quatter pitgas renanas da la Germania imperiala, numnadamain ils principadis ecclesiastics da Cologna, Magonza e Trier ed il Contadi palatin. La Baviera ed il Württemberg avevan surpiglià la dignitad roiala e declerà lur sortida da l’imperi roman. Uschia è svanì in element essenzial da la politica europeana dapi Otto il Grond (912–973). [Tenor LQ].