La banca trilingua

Clientas e clients da la Banca Chantunala Grischuna (BCG) pon profitar d’ina purschida lantschada l'october 2007: Tgi che ha interess survegn posta da la BCG er en rumantsch. «Sco banca grischuna enconuscha la BCG la valur culturala da la trilinguitad chantunala», di Thomas Roth, commember da la direcziun da la BCG, «perquai sa senta la banca obligada da contribuir sia part per il mantegniment e la tgira da tuttas trais linguas chantunalas.» Per quel motiv survegnan clientas e clients da la BCG sin giavisch lur extracts da banca ed autras annunzias da la banca er en versiun rumantscha.