Napoleun Bonaparte

1803 èn naschids il Grischun ed auters tschintg chantuns svizzers. L’Act da mediaziun dals 19 da favrer 1803, cuntanschì da l’emprim consul da la Republica franzosa tranter las partidas svizras, cumpigliava deschnov constituziuns chantunalas e l’Act federal. Napoleun Bonaparte (1769–1821) regiva da quel temp la Frantscha e l’Italia, cun la Vuclina, ed è pia vegnì er il chau suprem da Svizra. La mediaziun ha dà la pasch civila a la Svizra. Dentant n’astga il «mediatur» tuttina betg valair sco in filantrop: La Svizra, e cun ella blers auters pajais da l’Europa, han stuì patir fermamain da sias guerras. [Tenor LQ].