«Gemeinsam en Grigioni»

Quest onn festiveschan gist duas organisaziuns linguistic-culturalas dal Grischun in giubileum: la Walservereinigung Graubünden festivescha 50 onns e la Lia Rumantscha 90 onns. La terza organisaziun che promova la lingua e cultura en il Grischun è la Pro Grigioni Italiano ch'exista dapi l'onn 1918. Ensemen organiseschan las trais instituziuns che han in intent sumegliant in inscunter sut il titel «convivenza – gemeinsam en Grigioni». Il di tematic che duai activar la convivenza da las linguas e culturas en il Grischun ha lieu ils 16 d'october en l'Arena Grischuna a Cazas.