Anna Politkovskaja

Ils 7 d’october 2006 han ins mazzà a Moscau Anna Politkovskaja, schurnalista da la gasetta independenta e critica «Novaja Gaseta». Tuttas circumstanzas dal fatg inditgeschan in assassinat planisà cun intenziun. Politkovskaja rapportava savens davart la crisa en Tschetschenia dapi l’entschatta da la segunda guerra tschetschena 1999. Regularmain revelav’la situaziuns insupportablas, crititgond la politica da Moscau en il Caucasus. Uschè è’la vegnida renumada en Russia. Pliras giadas ha’la crititgà president Putin cun vehemenza. Per sias reportaschas ha’la survegnì pliras distincziuns russas ed estras, ma er insultas e pliras smanatschas da mort. L’assassinat da quella schurnalista excepziunala ha commovì la pressa mundiala. [Tenor LQ].