Il museum istoric dal Grischun sa chatta en la chasa Buol en la citad veglia da Cuira. Sco er en auters chantuns svizzers è il museum vegnì fundà a la fin dal 19avel tschientaner pervia da l'emigraziun pli e pli intensiva da bains culturals impurtants. Il giurist, istoricher e politicher Peter Conradin de Planta-Zuoz (1815-1902) ha perquai creà ina fundaziun en favur d'in «museum grischun per scienza ed art». L'onn 1872 ha il museum pudì avrir sias portas al plaunterren da la chasa Buol. Ils documents en agiunta preschentan l'istorgia dal museum e l'exposiziun permanenta sco ella sa preschenta actualmain (relisada 2007-2011).