En la baselgia claustrala da Müstair pon ins admirar in fresco che represchenta Cristus sco retg da l’univers. En il maun dretg tegna el in scepter sco ensaina da sia dignitad, en il sanester in cudesch avert, la Bibla. Quest maletg ornescha il frontispizi d’ina broschura edida l'onn 2006 cun il titel: «L’evangeli tenor Marcus». Lezza publicaziun munta ina lavur da pionier; per l’emprima giada cumpara in cudesch biblic en rumantsch grischun. Translatà al ha il teolog Gion Tscharner (Zernez); il preditgant Hans-Peter Schreich (Sta. Maria V.M.) ha revedì il text e procurà per la publicaziun. [Tenor LQ].