La Societad Retorumantscha (SSR) vesa sia lezia principala en la perscrutaziun scientifica da la lingua e cultura rumantscha. Ella è vegnida fundada il 1885, suenter duas emprovas senza success (1863/87), tras Gion Antoni Bühler (iniziant ed emprim president), Giachen Hasper Muoth, Alexander Balletta, J. Candreia, Christian Tuor, Hartman Caviezel e Tumasch Gross. La SSR è l’uniun purtadra dal «Dicziunari Rumantsch Grischun». Dapi l’onn 1886 edescha ella l’annuari «Annalas da la Societad Retorumantscha».