Il Lexicon istoric da la Svizra (LIS) maina dapi il 2023 vinavant ina tradiziun ch’aveva – da lez temp cun focus regiunal – cumenzà sco Lexicon Istoric Retic (LIR) e chattà per entant sia finiziun ils onns 2010-2012 cun la versiun stampada en dus toms. Sco ediziun parziala rumantscha en furma extendida metta il LIS digital l’accent principal sin artitgels da survista davart l’istorgia svizra sco er sin temas, persunas e lieus da relevanza surregiunala e naziunala. Cumplettada vegn la purschida cun migrar cuntinuadamain cuntegns da l’anteriur LIR en la structura dal nov lexicon online; quels furman pia er en l’avegnir in focus regiunal Grischun/Rumantschia.