La varietad da las vischnancas svizras che furman en lur summa la Confederaziun – quest simbol ha ina lunga tradiziun a las exposiziuns naziunalas svizras: A la «Landi» 39 a Turitg ha la Via auta represchentà las citads e vischnancas dal pajais. Ed a l’Expo 64 a Losanna ha la piramida da bandieras da las vischnancas svizras furmà in impurtant lieu d’identificaziun. A l’Expo. 02 dueva l’exposiziun Onoma cuntinuar cun questa tradiziun, en ina furma moderna e multimediala. A basa da relaziuns linguisticas tranter divers nums da vischnancas han ins creà 143 viadis cinematografics, ils quals cumpiglian radund 600 intervistas ch’èn vegnidas fatgas en ils singuls vitgs.