Pass a 2606 m che collia Tavau via il Dürrboden en la Val Dischma e l'Alp Funtauna en la Val Susauna cun S-chanf en l'Engiadin'Ota, numnà era S-chaletta. Il Scaletta ha obtegnì ses num dal tschancun da la vart engiadinaisa che furma ina stgala. En il temp medieval era il Scaletta la part centrala d'ina colliaziun intra-alpina d'impurtanza locala e regiunala che manava da Cuira sur il Pass da la Striera a Tavau e da S-chanf sur il Pass dal Chaschauna a Livign e Buorm. Surtut ils da Tavau utilisavan quella ruta per exportar lur products agriculs en Vuclina e per importar vin e graun. [Tenor e-lir].

(Foto: Paebi / CC BY-SA 3.0)