Ils 26 d’october 1919 è vegnida fundada a Cuira la Lia Rumantscha sco organisaziun da tetg da tut las societads linguisticas e culturalas rumantschas. Ils 27 da november 1919 è quella sa drizzada al Cussegl pitschen, per mauns dal Cussegl grond, cun in’instanza per retschaiver sustegn finanzial da vart dal Chantun. Ils 30 da schaner 1920 ha il Cussegl grond tractà la dumonda che n’era tuttavia betg incontestada. Quest curt cumpendi istoric, cumparì il 1989 a chaschun dal giubileum da 70 onns, dat in sguard als onns da fundaziun da la Lia Rumantscha.