Flurin Camathias (1871–1946) ha frequentà il gimnasi a Mustér e Friburg e studegià teologia a Cuira. Silsuenter è el stà plevon a Breil 1896–1917, Andiast 1917–34 e Siat 1934–46. Sco poet e translatur è el stà influenzà fermamain dal romanticissem tudestg e dal classicissem neolatin. Autur d’in epos istorisant en rimas, d’ina vita da sontg, d’ina collecziun da legendas e paraulas «medievalas», versifitgadas ed integradas en in raquint e d’in gieu festiv istoric. Camathias ha scrit ultra da quai numerusas poesias e translatà poesias liricas, cun preferenza d’auturs catalans e provenzals. [Tenor e-lir].