La salvgia è ina da las paucas ervas che survegnan in aroma pli ferm cun setgentar. Tuttina na datti nagut meglier ch’ils pitschens fegls frestgs da la salvgia cun lur aroma intensiv. Fegls giuvens gustan miaivel, fegls pli vegls levet da camfer. La salvgia è in’erva ordvart intensiva, perquai duess ins duvrar be paucs fegls. L’aroma sa sviluppa dal reminent il meglier cun brassar la salvgia en il grass durant cuschinar la tratga. La salvgia vegn duvrada per cundir diversas tratgas da charn – la pli enconuschenta è bain il saltimbocca. Quest’erva sa cunfa dentant er cun risot, cun verduras e cun sosas a basa da tomatas.

(Foto: christian alex / pixelio)