A partir dal 1363 è sa pegiurada la relaziun tranter l’uvestg da Cuira e ses subdits. Ils ducas austriacs avevan acquistà il contadi dal Tirol (cun la Val Müstair e l’Engiadina Bassa) e tschertgavan da s’acquistar era ils territoris da l’uvestgieu da Cuira. L’uvestg Peter Gelyto aveva cedì l’administraziun seculara als ducas d’Austria. Il 1365 èn sa reunids represchentants dal chapitel catedral, da las valladas grischunas e da la citad da Cuira a Zernez ed il 1367 a Cuira per far frunt a quest svilup inquietant. Questas deliberaziuns n’eran dentant anc betg il resultat d’ina veritabla allianza, mabain quel d’ina cuminanza d'urgenza. [Tenor e-lir].