Heinrich Zschokke è naschì il 1771 a Magdeburg ed è arrivà vers la fin dals onns 1790 en il Grischun. El è stà cumpossessur e directur dal Seminari da Johann Baptista von Tscharner en il chastè da La Punt/Rehanau e cunfundatur ed emprim redactur da la gasetta emnila «Der helvetische Volksfreund» (1797), il portavusch dals Patriots grischuns. En renconuschientscha da sias ovras litteraras e politicas ha el survegnì l'onn 1798 il vischinadi da las Trais Lias. Suenter la victoria da la reacziun l'onn 1798 ha el stuì fugir or dal Grischun. Tranter il 1799 ed il 1801 ha el occupà uffizis politics en trais chantuns (Waldstätten, Tessin e Basilea), ed il 1804 è el sa domicilià ad Aarau, nua ch'el ha occupà auts uffizis chantunals. [Tenor e-lir].