Tgi n’enconuscha betg quels bulieus alvs sgiagliads en furma da scalin che daventan vaira svelt rosa endadens per survegnir en curt temp ina colur naira e sa disfar finalmain en in paltaun da tinta naira? Il chalamer pelus crescha surtut il settember sin terrens fitg grass. Sia cumparsa na sa lascha betg scumbigliar cun auters bulieus. A quest gener appartegna era il chalamer grisch. El è pli robust ch’il chalamer pelus e dal tuttafatg different da quel. Ins sto far attenziun da betg baiver alcohol 24 uras avant e suenter avair consumà in chalamer grisch. Dal rest è quest gener da bulieus fitg pitschen.

(Foto: Nejmlez / CC BY-SA 3.0)