Rechats archeologics scuverts sin la motta dal chastè da Schiedberg cumprovan ina colonisaziun cuntinuanta da la regiun da Sagogn dal temp da bronz fin en il temp autmedieval. En l'8avel tschientaner sa chattava al vest da Schiedberg il center dal domini dals Zaccons/Victorids. L'onn 765 ha testamentà l'uvestg Tello a la claustra da Mustér ina chasa signurila cun accessoris, bains purils, ers, prads, vignas ed alps. La cretta refurmada ha adoptà mo ina minoritad dals da Sagogn. Dispitas confessiunalas han bunamain provocà il 1701 ina guerra da religiun en il Grischun. Las scolas èn restadas separadas confessiunalmain fin il 1914. [Tenor e-lir].

(Foto: Adrian Michael / CC BY-SA 3.0)