Ruschein è in vitg situà sin ina terrassa da la vart nord dal Rain Anteriur; il territori da l'anteriura vischnanca cumpiglia er l'Alp da Ruschein entadim la Val da Siat. En la regiun dal chastè da Frunsberg (ruina) è vegnì a la glisch in lieu da cult preistoric. En il temp carolingic existiva a Ruschein in bain central cun chasa signurila. En il 15avel-18avel tschientaner ha constituì Ruschein in vischinadi cun Ladir e Schnaus, a l'entschatta dal 21avel tschientaner furmavan las trais anteriuras vischnancas ina corporaziun d'alp. Meglieraziun generala 1963-94. Dapi il 2014 fa Ruschein part da la vischnanca dad Ilanz/Glion. [Tenor e-lir].

(Foto: Adrian Michael / CC BY-SA 3.0)