Sper si'activitad sco scolast gimnasial a Sviz ed a Cuira è Duri Sialm stà in dals cumponists rumantschs ils pli productivs e reproducids. El è il cumponist dal gieu festiv «La Ligia Grischa», da numerusas chanzuns fitg enconuschentas en stil romantic tardiv (tranter auter «Allas steilas», «Canzun dallas spatlunzas», «La lavina»), da cumposiziuns per instruments, da pliras messas e da 25 preludis. Il 1941 ha edì Sialm ensemen cun Carli Fry la versiun amplifitgada da la «Consolaziun dell'olma devoziusa». [Tenor e-lir].