Il pled ergoterapia deriva dal grec «ergon» (lavur, activitad) e «therapeia» (tgira, tractament) e stat per in tractament medicinal cumplessiv che cumpiglia aspects psicologics, pedagogics e socials. L’ergoterapia vegn applitgada tar pazients ch’èn restrenschids en lur capacitad d’agir, saja quai tras malsogna u accident u tras disturbis socials u dal svilup. La finamira da l’ergoterapia è da contribuir al process da guariziun, a l’activaziun ed a la reabilitaziun dals pazients e da promover surtut lur independenza. La participaziun activa dals pertutgads è fitg impurtanta per il decurs dal process e per l’organisaziun da lur vita da mintgadi.