L'onn 1802 steva per rumper or ina guerra civila en Svizra. Perquai ha Napoleon ordinà ch'il Senat e tut ils chantuns stoppian trametter deputads a Paris a l'uschenumnada «Consulta helvetica». Il Grischun ha delegà il federalist Florian von Planta e l'unitarist Jakob Ulrich Sprecher von Bernegg. Ils 19 da favrer 1803 ha Napoleon decretà l'Acta da mediaziun che cuntegneva er las novas constituziuns chantunalas. L’adesiun dal Grischun a la Svizra è vegnida messa en dumonda ina davosa giada en rom dal Culp da stadi reacziunar dal 1814. Il Contract federal dal 1815 ha dentant mess ina fin a tuttas tentativas da vulair restaurar las relaziuns politicas da la Veglia Republica.