A l'emprima perioda (forsa anc avant il 1200) appartegnan ils fastizs d'in mir da tschinta, che suonda en maniera irregulara l'ur dal grip, e d'in tract d'abitar en la part settentriunala. Da la segunda perioda (ca. 1300) deriva l'imposant donjon pentagonal (ina tur da defensiun e d'abitar). Il plaun il pli inferiur vegniva duvrà sco cisterna, dus plauns superiurs eran equipads cun cheminés e latrinas. La conclusiun superiura consistiva d'ina platta da defensiun. Il chastè era oriundamain ina sedia da l'aristocrazia locala. En il 13avel tschientaner è el passà als Saxs ch'han laschà construir il donjon. [Tenor e-lir].

(Foto: Adrian Michael / CC BY-SA 3.0)