|
Duf e Carpoffel èn ils dus protagonists dad in comic strip ch’è cumparì l'onn 2000 en La Quotidiana. I sa tracta d’ina lavur communabla da Gioni Fry e dad Andy Harper da la firma Apart. «Nus avain tschertgà ditg e lung in num per noss dus acturs. Da l’entschatta avain nus gì la finamira da dar nums originals e rumantschs che van en rima» di Gioni Fry. Duf è in um plitost magher e gnervus, entant che Carpoffel è da postura corpulenta, gea ins savess bunamain dir in sc’in tartuffel. Ensemen fan els filistuccas garnidas cun ina buna purziun cinissem. |
