Ils Trais Confederads e l’engirament dal Rütli cumparan vers la fin dal 15avel tschientaner sco elements centrals dal mitus da fundaziun svizzer. Tenor la legenda han represchentants dad Uri, Sviz e Silvania prestà sin il Rütli il sarament da s’alliar cunter ils chastellans tirannics da la chasa da Habsburg. Suenter ch’in dals chastellans è vegnì assassinà d’in dals conspiraturs (Tell) duai la sullevaziun esser prorutta a moda averta (destrucziun dals chastels). Quai dueva la finala manar a la fundaziun ed al svilup da la Veglia Confederaziun.