La meiosa furma la basa per la reproducziun sexuala, tar la quala las cellas masculinas e las cellas femininas sa reuneschan. Ils descendents survegnan pia ina maschaida dal genom da la mamma e da quel dal bab. Mintga genitur dat la mesadad da ses genom. Perquai che las duas cumparts dal genom sa differenzieschan en blers detagls, han ils uffants caracteristicas d’omadus geniturs. Quai vala per tut las creatiras cun reproducziun sexuala, pia tant per plantas, animals ed era per ils umans.