Cun il chastè da Prangins sper Nyon han ils chantuns Vad e Genevra surdà a la Confederaziun l'onn 1975 in edifizi adattà per laschar realisar in giavisch daditg desiderà: la constituziun da la sedia romanda dal Museum naziunal svizzer. Ina renovaziun difficultusa ma la finala bain reussida ha fatg in museum modern or d'in chastè cun ina lunga tradiziun e situà en in conturn da bellezza. A l'intern è vegnida creada in'exposiziun permanenta davart l'istorgia svizra tranter 1750 e 1920.

(Foto: Marco Zanoli / CC BY-SA 2.5)